الي جداتي حبيباتي

ممنوع تبكي

ممنوع تعبّري

ممنوع تشكي..

ممنوع تتضايقي..

ممنوع تحكي..

ممنوع تتاثري

ممنوع تحزني..

ممنوع تتكاثري..

ممنوع تجهشي بالبكاء...

حتي لو الوضع اتردّي..

ومهما الوضع ساء..

أكيد

هاد اكبر محظور..

وقمة الشرور...

غضب الناقصات

النساء..

دورك غانية

مش شاعرة..

مقهورة

مش قاهرة..

انت هون تطبخي

وتغسلي

يللا

اجلي الجلي..

ياللا يا شاطرة..

احبلي

بزري اولاد..

يزيدوا التعداد..

ويرفعوا جبهتها

لهالبلاد..

بلاش بنات..

تري وجودهن

liabilityليابيليتي

للممات

بيجيبن عار.. ووجع اعصاب..

بدك تخلصي..

ادعي ربك

ما تجيبي بنت..

جيبي ولد

ولي العهد

حتي مستقبلك يتامن

وينضمن

وتغلي

وتعلي

هاد يا شاطرة

موضعك

تحتي أنا

الله هيك حكا

عندك مشكلة؟

بتكوني كافرة!

بنرجمك رجم!

باسم الرحمن الرحيم

عظيم الحجم

لازم تعرفي

عشان ما تاسفي..

بالزبِط وين موقعك

ما بيعجبك؟

الله معك..

عالمقبرة!

عرفتي

يختي

موقعك.. ؟

مش قائدة ..

انتي تابعة..

حليوة.. زغيورة..

قانعة..

احفظي مركزك...

مكانك قابعة

ورا المجلي..

بين الطناجر

مش بين الكتب

والدفاتر ...

احلي ام

وخدامة بارعة

كوني وهمية..

امرأة عربية..

مخروسة ..

مخفية..

حلوة وغندورة

ياللا يا امورة

اتمنكري

واتنكري..

لَغْمِطي حالك ألوان ..

تيحبك سبع الزمان

مهمتك تربيه

وعلى علاته تحبيه

وبدون شروط

تدعمي

وتخدمي

واكتفي

انك تختفي

تسكتي على الضنا

وتنشفي

وهو يزدهر

وهو ينتشر

واياكي تشكي اياكي

ولا تثوري

او تحاولي تكبري

او تكفري

اعرفي

مطرحك

حتى تسلمي

كوني وهمية

امرأة عربية

مخروسة

مهروسة

مخفية

عديمة الاهمية

بدنا أياكي يا شطورة

تكوني حلوة وامورة

ساكتة

ساكنة

غير مرئية

والام المثالية

غير مسموعة

نغشة ودلوعة

راضية وخنوعة

ياللا اخنقي شهواتك

وانتفي شعراتك

واقضي نص حياتك

تتكحلي

وتتغندري

ياللا تعطري

ياللا اتمنكري..

ياللا اتنكري..

وهزي الخصر

وشدي الوجه

عشان يحبك

بطل الأزمان

حامي الأوطان

الزبير بن المقدام

ياللا يا صنيورة

غطي راسك

وغطي عقلك

البسي فستان!

البسي طنورة!

البسي كعب عالي

وكنادر مؤلمة

عشان تنحبّي

وتنفقي

لا يفوتك القطار

لازمك رجل

ولو رطل

حتي لو بيكون حمار

وينني انا في تاريخكم؟

وينني ؟؟؟

انا؟؟!؟

لا في الجزيرة

ولا في حلب

ولا في ليالي الانس

في الاندلس

ولا في النجف

انا صفر؟

ما الي في تاريخكم ذكر ؟؟

وينني انا؟؟؟

يا ذكر

بدي اعرف

وينني انا؟؟

وينني انا؟؟

وينني انا؟؟

وينني انا؟؟

وينني انا؟؟

في تاريح العرب؟

مالي اثر؟

نعم؟

نعم نعم ؟؟

انتي مرة!!!

مكانك ورا!!

غنمة

نعجة

بتباع

وبتنشرى

لازم تعرفي انو أنا الولي

وانا الوصي

الرجال بيقرروا

وانتوا بتتمنكرو

زي ما بيقولوا

بتعملي

همة ابو عنتر

وانتي بتنخصي

همة بينكحوا

وانتي بتحبلي

همة الآلهة

والمفروض تسجدي

تعبدي

وتتعبدي

هو بيغزي

وانت هزي

خصرك

عمهلك

يا روح اهلك

همة بيسبقوا

وانتي بتلحقي

انتي العاهرة

وهوه التقي

هوة السبع

وانتي

انتي؟

انتي اللبوة

مهمتك تخدمي

وتطيعي وتولِدي

وظيفتك بكل هدوء

تتفرجي

وتطبخي

وتمكيجي

وتحافظي علي شرف العيلة

وتوفري الحب باخر الليلة

وما تتململي

ولا تقولي كفي

وما تضجري

بل تشكري

وكمان تستمتعي!!

اختي ..

لا تِتْفَجَري

لا تِتْفَجَري

لا تِتْفَجَري

لا تِتْفَجَري

!!!!!!!!!!!!!

ممنوع الانفجار

ممنوع الانتحار

مسموح الاندثار

وبس

وبس

وبس

!!!

هاد حظك من الدني

هالمكان الهني

يا سعدك وفرحتك

صار لك الشرف

يمتلكك رجل!

يا دي الهنا

يا دي الأمل

ياللا افرحي!

ياللا ارقصي!

ياللا ولِك!

هزي النهد!

يا وش السعد

يا اشي انتي

يا ولا اشي..

يا نهدين وفخد..

خليكي في مطرحك!

دورك في المجتمع

خدامة!

وانا الملك!

انتي جارية

وانا بركبك

لا تطمحي

لا تطمعي

تصيري اشي

بمنأى

عن ظل الرجل

لا تطمحي

لا تحلمي

لا تِطْوَلي

فاهمة ولي؟

ما رح تطوَلي

عن اقصر رجل

ما الك حمامة

ما عندك امل

'ما في حمامة' يا زرقا اليمامة يعني

: 'احفظي موقعك'

الك جائزة في اخر البرنامج

والله معك

حظا اوفر

يا اخت كوثر

ويا ما تشوفي

لسة وياما

قلّعوا عيونك الخارقة

الامة الفاشلة

أمة الظلام الفاسقة

الواطية المنافقة

ودفنوكي انتي

وعيونك

يا جدتي

محوا ذكراكي

اللي اسمهم امتي

من تاريخهم المزور

المفلفل المبهر

بس مش من مخيلتي

انتوا في وجداني

وجيناتي

يا جداتي

يا جدتي

يا فخري

وشرفي

يا تاريخي

ومستقبلي

وقصتي

يا جدتي.

وينكم يا جداتي..

تعالوا شوفوا حياتي

..

الله ليش اعطانا القهر؟ حتى بنساب الشعر