More عبثية

ما حد سائل..

لأني مش منكم..

لأني مش مثلكم..

لا متلَك ولا مِتله ولا متلها..

مش مهمة متلكم..

مش شيخة..

مش اشي كتير متلكم..

مش غنية..

ولا أصلية ..

لا أنا مسلمة ولا ملحدة

ولا مسيحية..

ما ليش مكان أنا..

في تقسيماتكم الاجتماعية...

لا انا من طبقة ناعمة بيضا..

بضة.. غضة.. أرستقراطية

ولا من عيلة ذات اي اهمية..

بتمروا جنبي ما بتشوفوني..

ولا المرحبا بتردّوها..

لا بتردوا السلام..

ولا بتفتحوا مجال..

لأي كلام..

عشاني انثى في عالم ذكوري..

فنانة في عالم مادي متطرف.

اماكن الفن فيه محدودة ومعدودة

ومحسوبة ومدروسة.

وتكاد تكون معدومة.

انا مش متلكم مهمة.

لا أنا معروفة... ولا مشهورة..

الظلم في حياتي حقيقة..

وإحساس بالحزن والألم ..

ودايما مقهورة...

بتخبط بين يأس وآمل

ما بين احلام لسة ما تحققت.

ووعود مكسورة..

وفقلبي نار

تحت الرحى.. مجروشة..

وبقاوم باستمرار..

بعرف،

ما الي عندكم جدوى اقتصادية..

او فايدة عملية..

لا عندي منصب ولا مركز حساس..

لا رح أزيدكم شهرة

او شعبية..

بوينتلس أنا الكو..

أنا بوينتلس أنا..

مش من هون أنا...

وين ما بروح أجنبية..

أنا اللي رقصت عالسلالم

في العتمة

سنين وسنين..

لا حد سمع ولا حد شاف..

رقصتها العبقرية..

مش من هون أنا..

ولا حتى هون أنا..

بعيدة كتير أنا ..

عن كل آشي..

عن كل حدا...

في الغربة منفية..

مش من هون أنا..

ولا من هون

او هون او هون..

انا الغريبة..

البرّانية...

ناسف على الوضع..

ناسف على الحزن...

نأسف علي العبثية..

كل عام وانتم بخير.. انتوا وكل البشرية..