فيروز

 حصل حديث بيني وبين صديقة جديدة.  عن الموسيقا. هذا روحه.   

-كيف انتي والموسيقا

- بحب الموسيقا

- مين بتحبي؟ شو بتحبي؟ 

- كل شي. كتير أشياء 

- زي ايش؟

- جاز مثلا 

- classical music? 

- اكيد 

- بيتهوفن الخ... 

- تشايكوفسكي الخ...

- وايش بالنسبة للموسيقا العربية؟ فيروز

- ما بحب فيروز

- ما بتحبي فيروز؟ ما بتحبي فيروز؟؟؟؟؟؟؟ كيف ما بتحبي فيروز؟ بطَّلت احبك!!!

- صوتها مسلوع، بلا بلا بلا

كيف ما بتحبش فيروز؟ مخي سألني؟ الهة الفن الحيه؟ أعجوبة العصر. جارة القمر؟ سفيرتنا الى النجوم؟ من اهم رواد  الثورة الموسيقية العربية الحديثة  والمسرح الغنائي. كيف ما بتحب فيروز

- اهلي كرّهوني إياها قد ما كانوا يسمعوها

كيف حد ممكن ما يحب فيروز؟ عقلي ما قدر يستوعب. كيف حد ما يحب الملاك الحي؟  فيروز الراكزة المحترمة صاحبة المبادئ والاخلاق الفنية العالية والذوق العالي الحنونة اللي بتلمس قلوب الملايين. ما استوعب عقلي. 

حاولت أغير مجري الحديث. بس عقلي بعده ملزق عند جملة : ما بحب فيروز. 

- زياد؟

- نعم زياد. اكيد زياد

- بلا بلا بلا

- بلا بلا بلا

- بحب فريد الأطرش 

- فريد الأطرش؟ فريد الأطرش؟؟؟؟ عن جد بطَّلت احبك؟

بتحب فريد الأطرش! طول عمري بستغرب من اللي بيحبوا فريد الأطرش. بشوفوا شي غريب. 

انا ما بجمطه نهائي. موسيقته حلوه، ألحانه حلوة. أغانيه حلوة. بس ما بقدر اتخيل حد يحبه هو. أدائه بيستفزني. صوته بيستفزني. بيزعجني. بحسه طالع بالحزق. بيحزق على حاله بيخلّيني صعب أتنفس. 

الحقيقة اني ما بطلت أحب صاحبتي هاي. بس مصدومة. لازم اذكر حالي ان الناس اذواق. قررت لازم ألاقي شغلة وحدة احبها في فريد الأطرش. لا بد الاقي في شي فيلم قديم ولو لحظة يكون فيها مهضوم.

 اما بالنسبة لفيروز. بعدني مصدومة. صدمة مؤمن متعبد بحد كفر في الله. وكيف ممكن ناس يعقدوا ناس من اجمل ظواهر الكون. فيروز صوتها ممكن كان مسلوع لما كانت صبية صغيرة. بس هاي مش صفته العامة. صوتها على مر السنين اتطوّر واتغير وسنة عن سنة بيغلى على قلبي صوتك يا آلهة الفن. يا ام الفن يا صوتنا.  اعذريها. سامحوها يا عشاق الكلمة والنغم والأصالة والابداع. بيكفيها انها هي محرومة من حب فيروز. من الثراء الروحي والرقي الفني والثقافي اللي بتجلبه فيروز ومجموعتها. هي بتعاقب حالها بسبب فكرة. بتمنى تعطي حالها مجال تسمع وتحس بدون الفكرة الحاجز. تسمح لروحها تتحرر. 

يمكن في اشي تاني بيحررها وبيطيرها. موسيقا تانية غير فيروز. ليش ما افتح مخي؟ ليش ما اقبل ان الانسانية فيها تنوع. والطرق للرقي الروحي عديدة؟ بقبل. عن جد بقبل. بس برضو مصرّة ان اي شخص من بلاد الشام مش بأمكانه ما يحب فيروز. زي ما حد من مصر ما يحب النيل مصدر الحياة. فيروز نيلنا. فيروز قمرنا. كوكبنا المشرق. بتمنالها العمر الطويل والصحة الممتازة وتبقي نجمة وقمر فوق رؤوسنا. خالدة الى أبد الدهر يا فيروزنا بصوتك وتاريخك وانجازاتك الفنية العالمية.